Psa 90 | NdeIBE | STEP | Umthandazo kaMosi umuntu kaNkulunkulu. Jehova, wena ulikhaya lethu kuzo zonke izizukulwane.

Psalms 90

4 Ihubo 90–106

Umthandazo kaMosi umuntu kaNkulunkulu.

1 Jehova, wena ulikhaya lethu kuzo zonke izizukulwane.

2 Izintaba zingakabikhona lalapho ungakawuvezi umhlaba kanye lelizwe, kusukela phakade kuze kube phakade unguNkulunkulu.

3 Ubuyisela abantu ethulini, usithi, “Buyelani othulini, lina madodana abantu.”

4 Ngokuba iminyaka eyinkulungwane ekuboneni kwakho injengosuku olusanda kudlula, kumbe njengomlindo webusuku.

5 Uyabakhucula abantu ebuthongweni bokufa; banjengotshani obutsha obekuseni

6 lokuba ekuseni buhluma bubutsha, kuthi ntambama sebomile sebubunile.

7 Sijwamulwa lulaka lwakho sithuthumeliswe yikucaphuka kwakho.

8 Usubuchayile ububi bethu phambi kwakho, izono zethu zensitha wazichaya ekukhanyeni kobukhona bakho.

9 Zonke izinsuku zethu ziyedlula ngaphansi kolaka lwakho; leminyaka yethu siyiphetha ngokububula.

10 Ubude bezinsuku zethu buyiminyaka engamatshumi ayisikhombisa – loba amatshumi aficamibili, nxa silamandla; kanti lelobanga layo liluhlupho losizi, ngokuba iphanga yedlule, lathi siphaphe nje sedlule.

11 Ngubani owaziyo amandla olaka lwakho na? Ngokuba intukuthelo yakho inkulu njengokwesatshwa okukufaneleyo.

12 Sifundise ukubala kuhle izinsuku zethu, ukuze sizuze inhliziyo yenhlakanipho.

13 Phola, O Jehova! Koze kube nini kulokhu kunjalo na? Woba lesihawu ezincekwini zakho.

14 Sisuthise ekuseni ngothando lwakho olungaphuthiyo, ukuze sihlabelele ngentokozo sijabule zonke izinsuku zethu.

15 Senze sijabule okwezinsuku ezilingana ukusihlupha kwakho, okwezinsuku ezilingana lalezo esesabona ngazo ukudubeka.

16 Sengathi imisebenzi yakho ingatshengiswa ezincekwini zakho, inkazimulo yakho ebantwaneni babo.

17 Sengathi umusa kaJehova uNkulunkulu wethu ungehlela kithi; uqinise umsebenzi wezandla zethu – yebo, qinisa umsebenzi wezandla zethu.